Кетеева Жадыра Жақсылыққызы

Өмірбаян

Кетеева Жадыра Жақсылыққызы 1975 жылдың 1 қазанында Маңғыстау облысы Ералиев ауданы (қазіргі Қарақия) Жетібай поселкесінде дүниеге келген. Әкесі – Кетеев Жақсылық, ұзақ жылдар мұнай саласында қызмет еткен. Анасы Сейлханова Замзе, үй шаруасында, «Алтын алқа» иегері.

1982 жылы Жетібайдың №8 орта мектебінің табалдырығын аттап, 1992 жылы осы мектепті бітіріп шыққан.

1993 жылы еңбек жолын Маңғыстау облыстық тарихи-өлкетану музейінде  экскурсовод  болып бастаған. 2000-2003 жылдар аралығында экскурсия-көпшілік бөлімінің меңгерушісі. 2004-2006 жылдарда археология-этнография бөлімінің ғылыми қызметкері, 2006  жылдан  2017 жылға дейін музейдің бас қор сақтаушы қызметін атқарған.

2006  жылы Е.Бөкетов  атындағы  Қарағанды  мемлекеттік университетін эколог, экология және биология пәнінің мұғалімі мамандығы бойынша бітіріп шықты.

Маңғыстау облыстық тарихи-өлкетану музейінде қызмет еткен 24 жыл  ішінде  музейдің ғылыми, зерттеу, насихаттау және қоғамдық жұмыстарына  қатысқан. Музей қоры  және жәдігерлерді  іздеу, жинақтау, тіркеу, сақтау жұмыстарын ұйымдастырған. «Мәдени мұра»  бағдарламасы  бойынша  жарық  көрген  музей басылымдарының мәтінін дайындауға қатысып, нәтижесінде «Маңғыстаудың зергерлік өнері» кітабы, «Киіз үйдің жүннен жасалған  бұйымдары», «Текеметтің  түрлері»,  кітапшалары жарыққа шықты. «Маңғыстаудың киіз үйі» атты бейнефильмді түсіру бағдарламасын дайындауға тікелей қатысқан.

Осы  жылдар  ішінде  музей  қорынан  жасақталған  облыс, республика көлеміндегі және шет елдерге апарылған жәдігерлер құжаттарының дайындалуына, көрмелердің безендірілуіне үлес қосқан.

Музейдің осы жылдарда жасақталған жаңа экспозиция залдарына, соның  ішінде  «Маңғыстаудың  ХХ ғасырдағы  тарихы», «Археология», Әбіш Кекілбаев шығармашылығына арналған залдарының жасақталуына қатысқан.

2017 жылы «Отпан» МКҚК директорының орынбасары қызметіне ауысқан. 2020 жылдың 30 желтоқсанынан бастап кәсіпорынның директоры қызметін атқарады.

Жанұясы бар. Жұбайы – Отарбаев Жанәділ. Динара, Нұргүл есімді қыздары бар.